د ملګرو ملتونو د بشري مرستو مشر د مهاجرینو چارو له سرپرست سره ولیدل
د ملګرو ملتونو د بشري مرستو مشر ښاغلي دانیېل انډرس او د یونسیار او آی او ام موسسو استازو د مهاجرینو او راستنېدونکو چارو له سرپرست سره د هغه د کار په دفتر کې ولیدل
په دغه ناسته کې د راستنېدونکو مهاجرینو په ستونزو، اساسي حللارو، دایمي سرپناه او کاري فرصتونو په برابرولو خبرې وشوې
ښاغلي انډرس د مهاجرینو اوسنی حالت د اندیښنې وړ وباله او د هغوی ستونزو ته د رسیدنې لپاره یې په ګډه همکارۍ ټینګار وکړ، نوموړي مهاجرینو ته د ښه خدماتو وړاندې کولو له امله د سرپرست وزیر هلې ځلې وستایلې
د مهاجرینو چارو وزیر وویل، اسلامي امارت د راستنېدونکو له تثبیت او لنډمهاله ځای پرځای کېدنې نیولې تر دایمي ادغام او کاري فرصتونو برابرولو پورې ټول پلان جوړ کړی او ددغه پلان د تطبیق لپاره د اسلامي امارت د رهبرۍ په کچه مشران په تورخم او سپین بولدک کې موجود دي، مرستندویه ادارې دې په دې برخه کې د ااا ملاتړ وکړي
نوموړي له ملګرو ملتونو وغوښتل، چې له خپل رسوخ څخه په ګټه اخستنې دې په کوربه هېوادونو فشار راولي ترڅو د مهاجرینو د منل شوو حقوقو له نقض څخه لاس واخلي
د مهاجرینو چارو وزارت مالي او اداري مرستیال محمد ارسلاح خروټي د ښه خدماتو وړاندې کولو لپاره د دواړو لوریو همغږي اړینه وبلله، او زیاته یې کړه د امارت له طرفه په دومره لویه کچه انتظامات د نظام ژمنتیا ښيي او مرستندویه ادارې هم بیړنیو حالاتو ته په کتو باید خپل کاري پرسونل زیات او کاري وخت ۲۴ ساعتونو ته وغځوي، همدا راز په ولایاتو کې د مهاجرینو ځای پرځای کېدو ته څنګه چې لازمه ده تیاری ونیول شي
