د مهاجرینو چارو وزارت کې د پاکستان د بریدونو له امله له تازه بېځایه شویو سره د مرستې په اړه ناسته وشوه
د مهاجرینو او راستنېدونکو چارو وزارت د دفتر رییس مولوي سعید احمد بنوري پر مشرۍ په یاد وزارت کې د کډوالو په چارو کې د ملګرو ملتونو د عالي کمېشنرۍ له مرستیالې اغلې ونیسا متر بولي او د دغې کمېشنرۍ د عملیاتي برخې له رییس ښاغلي عدن حاجي دکاني سره ناسته وشوه.
په دغې ناسته کې په تورخم فرضي کرښه کې د پاکستان د بريدونو له امله له زرګونو بېځایه شویو کورنیو او په کابل کې د هوايي برید د قربانیانو له کورنیو سره د مرستې په اړه خبرې وشوې.
ښاغلي بنوري د هغوی له همکاریو پر مننې د مرستو پر زیاتوالي، د پاکستان د بریدونو له امله د تازه بېځایه شویو د لومړیو ستونزو حلولو، د ظلم او په جبري توګه د کډوالو د اېستلو مخنیوي او د هغوی له حقونو څخه پر ملاتړ ټينګار وکړ. د کمېشنرۍ له مسوولانو یې وغوښتل، چې په ګاونډیو هېوادنو کې د افغان کډوالو له حقونو هر اړخیز ملاتړ وکړي.
اغلې بولي د نننۍ ناستې موخه د پاکستان د بریدونو له امله له تازه بېځایه شویو سره مرسته یاده کړه او ویې ویل: دغه کمېشنرۍ په پام کې لري، چې له ګاونډيو هېوادونو څخه راستنو شویو ته نغدي، خوراکي او غیرخوراکي مرستې وړاندې کړي.
نوموړې زیاته کړه، چې له خپلو همکارو موسسو سره به د مرستې موضوع شریکه کړي او هغوی به لا زیاتې مرستې ته وهڅوي.
