د مهاجرینو چارو وزارت مسلکي معین د ملګرو ملتونو د پراختیايي برنامو دفتر له مرستیال سره ولیدل

د مهاجرینو او راستنېدونکو چارو وزارت مسلکي معین ښاغلي مولوي عبدالرحمن راشد نن چهارشنبه د چنګاښ په ۲۴مه د ملګرو ملتونو د پراختیايي برنامو دفتر(UNDP) له مرستیال سره ولیدل.
د دغې لیدنې موخه د کډوالو په چارو کې د ملګرو ملتونو عالي کمېشنرۍ، د نړۍوالۍ کډوالۍ سازمان، د بیامېشتېدنې او د ملګرو ملتونو پراختیايي برنامې له لوري په بغلان او کندز کې د پلي شویو برنامو د کاري پرمختګ ارزونه وه.
ښاغلي راشد د همکارۍ ارزښت ته په اشارې له UNDP څخه د برنامو د اسانه پلي کولو په برخه کې له دویمو واحدونو سره پر همکارۍ او همغږۍ ټینګار وکړ.
د UNDP مرستیال ستونزو ته د رسېدنې په برخه کې د یاد وزارت له همکاریو، د ناستو ارزښت، له خصوصي ادارو سره د میکانیزم جوړښت او تخنیکي ټېم له جوړښت خوښي څرګنده کړه او د برنامو د پلي کولو موخه یې د کډوالو د اقتصادي وضعیت ښه‌والی یاد کړ.
دواړو اړخونو د ګډو موخو په ترلاسه کولو ټينګار وکړ.
ورته ناستې د کډوالو د ټولنيز او اقتصادي پرمختګ په برخه کې د مهاجرینو او راستنېدونکو چارو وزارت ګډې هڅې څرګندوي.