طبيعي پېښو پروړاندې د مبارزې د کړنلارې نهايي کولو ناسته ترسره شوه
د مهاجرينو او ارتسندېدونکو چارو وزارت حقوقي سلاکار قاري محمود شاه په مشرۍ د وږي په (۲۳) مه د طبيعي پېښو پروړاندې د مبارزې د کړنلارې نهايي کولو په موخه ناسته ترسر شوه.
په ناسته کې، چې د مرکزي رئيسانو او امرينو په ګډون ترسره شوه، د مهاجرينو وزارت حقوقي سلاکار قاري محمود شاه په هېواد کې د طبيعي پېښو د رامېنځته کېدو، اوښتي زيانونو او د مهاجرينو او راستنېدونکو چارو وزارت د مکلفيتونو او مسؤليتونو په اړه خبرې وکړې او د طبيعي پېښو پروړاندې د مبارزې د کړنلارې نهايي کول يې يوه بېړنۍ اړتيا وګڼله.
ورپسې د ناستې ګډنوالو د رياستونو د مکلفيتونو او دهغوی د دندو د لايحو په اړه خبرې وکړې او ټينګار يې وکړ، چې کړنلاره بايد داسې جوړه شي، چې په کارولو سره يې په دندو کې د لاسوهنې دمخنيوي ترڅنګ د موثريت او چټکتيا لامل هم شي.
همدارنګه د اړوندو رياستونو تخنيکي کارکوونکو ته دنده وسپارل شوه، چې موجوده اسناد او کړنلارې مطالعه کړي، اړين مواد او موضوعات چمتوکړي او راتلونکي ته يې وړاندې کړي.
