د مهاجرینو وزیر د پاکستان د افغان کډوالو لوی کمشنر سره لیدنه وکړه
شنبه ۹ سلواغه ۱۴۰۰/۲۶ جمادی الثاني ۱۴۴۳
د کډوالو او راستنېدونکو چارو وزیر الحاج خلیل الرحمن حقاني په خپل کاري دفتر کې د پاکستان هېواد د افغان کډوالو لوی کمشنر سلیم خان سره لیدنه وکړه او په پاکستان د مېشت افغان کډوالو په شته ستونزو او ننګونو یې خبرې وکړې.
په دغه ناسته کې، چې ددغه وزارت مرستیال محمد ارسلاح خروټي هم ګډون درلود، الحاج خلیل الرحمن حقاني د افغان کډوالو لوی کمشنر ته ښه راغلاست وکړ او د نوموړي څخه یې غوښتنه وکړه، چې په پاکستان کې د مېشت افغان کډوالو ستونزو او ننګونو ته دې رسیدګي وکړي او د دوی پر وړاندې د هر ډول ننګونو او ستونزو د حل په برخه کې دې د کډوالو او راستنېدونکو چارو وزارت سره همکاري وکړي.
د کډوالو کمېسیون مشر سلیم خان ښاغلي وزیر ته ډاډ ورکړ او ژمنه یې وکړه، چې د افغان کډوالو شته ستونزې به د مرکزي اداري سره شریکي او د حل په موخه به یې لازمې کړنې تر سره کړي.
د مهاجرینو وزارت مرستیال محمد ارسلاح خروټي د افغان کډوالو کمشنر سلیم خان څخه وغوښتل ویې ویل، هغه افغان مهاجرین چې په ګاونډي هېواد پاکستان کې اوسېږي د ژوند د لومړنیو اړتیاو په نظر کې نيولو سربېره ورته د روغتیايي خدماتو او دیني اوعصري زده کړو زمینه برابره کړي.
