د کډوالو او راستنېدونکو چارو سرپرست وزیر محترم مولوي عبدالکبیر په جلاجلا ناستو کې د اهل تشیع له څو تنو مخورو او علماوو سره وکتل.
په دغو ناستو کې چې د کډوالو د ستونزو پر حل او د اهل تشیع ولسونو د یو لړ وړاندېزونو په هکله په کې خبرې وشوې، راغلو مخورو د قومونو د ستونزو د حل په برخه کې د اسلامي امارت د هڅو په ستایلو سره وویل، چې اهل تشیع وګړي د اسلامي نظام له کړنو رضایت لري.
حاضرو مخورو او علماوو په ایران کې د افغان مهاجرینو د قانوني اسنادو او د هېواد په ځینو سیمو کې کډوالو ته د استوګنیزو ښارګوټو اړوند وړاندیزونه له محترم مولوي عبدالکبیر سره شریک کړل.
محترم مولوي عبدالکبیر د اهل تشیع مخورو او علماوو ته د ښه راغلاست پر مهال وویل، چې اسلامي امارت د مهاجرینو ستونزو ته متوجه دی او اړوندو امارتي ادارو ته دنده سپارل شوې چې په بهر کې افغان کډوالو ته د اړتیا وړ اسناد چمتو کړي.
محترم وزیر د اسلامي امارت ادارې د ولس په خدمت کې وبللې او په وینا یې چې حکومت د اغېزمن کار په موخه د خلکو همکارۍ ته اړتیا لري.
محترم مولوي عبدالکبیر، د خپلو خبرو په پای کې، د اهل تشیع د مخورو وړاندیزونو ته د رسیدنې ډاډ ورکړ.
