د اروپایي ټولنې سفیرې د مهاجرینو چارو وزیر سره ولیدل
په افغانستان کې د اروپایي ټولنې سفیرې آغلې ویرونیکا د مهاجرینو او راستنېدونکو چارو له وزیر الحاج خلیل الرحمن حقاني سره دده د کار په دفتر کې ولیدل.
په ناسته کې په پاکستان او ایران کې د مهاجرینو په ستونزو، د جرمني او نورو اروپایي هېوادونو لخوا د مهاجرینو د جبري ویستلو، یا نورو هېوادونو ته د لیږدولو، د داخلي بېځایه شوو د پایدار ادغام او هغوی ته د مرستو جلبولو په اړه خبرې وشوې.
د مهاجرینو چارو وزیر د مهاجرینو په برخه کې د اروپایي ټولنې د مرستو مننه وکړه او زیاته یې کړه، چې د مهاجرینو په نوم کیدونکې مرستې دې مستقیما مهاجرینو ته ورکړل شي او باید په اساسي کارونو، سرپناه، کاري فرصتونو او اقتصادي ملاتړ کې مصرف شي.
آغلې ویرونیکا د مهاجرینو ستونزو ته رسیدګي د ټولو ګډ مسولیت وباله او ویې ویل: مونږ د مهاجرینو او نورو اړمنو د لاسنیوي لپاره د ملګرو ملتونو له مرستندويه ادارو سره ١٢٥ میلیونه یورو مرسته کړې ده او د کال ترپایه به ٣٦ میلیونه نوره مرسته هم ورسره وکړو.
دواړو لوریو د یوه ګډ میکانیزم رامنځته کولو لپاره د ګډې تخنیکي کمېټې په جوړولو توافق وکړ.
