د مهاجرینو او راستنېدونکو چارو سرپرست وزیر محترم مولوي عبدالکبیر د نیکمرغه لوی اختر په درېیمه د اسلامي امارت د یو شمېر ملکي او پوځي چارواکو سربــېره له ګڼ شمېر علماوو او عامو هېوادوالو سره وکتل.
د لیدنو په لړ کې راغلو علمای کرامو، قومي مخورو، مجاهدینو او عامو هېوادوالو په بشپړه امنه فضأ کې د لوی اختر پر نمانځلو خوښي څرګنده کړه او له څو لسیزو وروسته، د اسلامي امارت په واکمنۍ اوسنی امن یې د افغان ولس لویه لاسته رواړنه وبلله.
په دغو ناستو کې حاضرو علمای کرامو او مخورو د ولس او اسلامي امارت د مشرانو تر منځ د لاډېرو لیدنو یادونه وکړه او همدارنګه هغوی د ځینو مسائلو په هکله خپلې سلا مشورې له محترم مولوي عبدالکبیر سره شریکې کړې.
محترم مولوي عبدالکبیر راغلو چارواکو، علمای کرامو، قومي مخورو او حاضرینو ته د نیکمرغه لوی اختر مبارکي وویله او له اسلامي نظام سره یې د ولس همکارۍ خورا ګټورې وبللې.
محترم وزیر زیاته کړه، چې اسلامي امارت د افغانستان رغولو ته ژمن دی او له هرې ممکنې لارې د ولس د ستونزو حل او خلکو ته د خدماتو د وړاندې کېدو هڅې کوي.
محترم وزیر یادونه وکړه، چې هېوادوال کولای شي په جرات خپل وړاندېزونه او غوښتنې له حکومت سره شریکې کړي.
