د ترکیې سفارت د کورنیو چارو سلاکار د مهاجرینو چارو وزارت د پلان او پالیسۍ له رییس سره د پېژندګلوۍ ناسته وکړه.
د ترکیې هېواد د کورنیو چارو سلاکار ښاغلي ظفر کیشي او په کابل کې د ترکیې سفارت دویم سکرتر ښاغلي امین اورحان دره لي د مهاجرینو او راستنېدونکو چارو زارت د پلان او پالیسۍ رییس مولوي محمود الحق احدي سره وکتل.
په دې کتنه کې په ترکيه کې د مېشتو افغان مهاجرينو پر ستونزو خبرې وشوې.
ښاغلي احدي هغوی ته په ښه راغلاست سره وویل: موږ له ترکیې سره ښې اړیکې لرو، د اسلامي امارت په راتګ سره ستونزې کمې شوې او خپل هېواد ته د افغانانو د راستنېدو لپاره ښه شرایط برابر شوي دي.
نوموړي په هېواد کې د کارموندنې او ښوونیزو پروګرامونو په برخه کې د ترکیې له سفارت څخه د لا زیاتو همکاریو غوښتنه وکړه.
د ترکیې د کورنیو چارو کې سلاکار د افغان مهاجرینو ستونزو ته د رسېدنې لپاره د ښو اړیکو لرل د دغې ناستې موخه وګڼله.
هغه وویل، د مهاجرینو ستونزې دې له موږ سره شریکې شي، چې د ترکیې له جګپوړو چارواکو سره یې شریکې کړو او له یو بل سره په هوکړه مثبتې پایلې ترلاسه کړو.
