په مهاجرینو وزارت کې د چین هېواد د مرستو د دویمې جوپې بیا کتنې په اړه ناسته وشوه.
د مهاجرینو او راستنېدونکو چارو وزارت د پلان او پالیسۍ رییس مولوي محمود الحق احدي په مشرۍ د چین هېواد د مرستو د دویمې جوپې پلان جوړونې او بیا کتنې په اړه ناسته ترسره شوه.
په دې ناسته کې د چین سفارت د اقتصادي او سوداګرۍ سلاکار ماچنګوانګ او د یاد سفارت د اقتصادي او سوداګریزي برخې دریم سکرتر، د اتشه وو رییس، د مهاجرینو چارو همغږۍ کوونکي، مالي او اداري او په مهاجرینو وزارت کې د موسساتو همغږي کوونکو رییسانو ګډون درلود.
ښاغلي احدي د چین هېواد څخه د ۴۰ میلیونه چیني ینو په ارزښت د لومړۍ جوپې څخه د مننې تر څنګ وویل: چې یادې مرستې مستحقو او اړمنو کسانو ته د لومړنیو اړتیاوو پوره کولو په موخه ویشل شوې دي.
نوموړي زیاته کړه: چې چین هېواد سره یې د مرستو په برخه کې ښه همغږي لرې او په پام کې لري چې د مرستو دویمه محموله کې هم اړمن کسان په نظر کې ونیسي.
په پام کې ده، چې په نږدې راتلونکي کې د ۶۰ میلیونه چیني ینو په ارزښت د مرستو دویمه جوپه د یاد وزارت په واک کې ورکړل شي.
