په راتلونکي کې د بې ځایه شویو د لېږد په اړه ګډه ناسته وشوه
د مهاجرینو او راستنیدونکو چارو وزارت او د کډوالو په چارو کې د ملګرو ملتونو عالي کمېشنرۍ د استازو ترمنځ د سلواغې پر دویمه نېټه خپلو اصلي مېنو ته د بې ځایه شویو کورنیو د لېږد په اړه ګډه ناسته وشوه
د دې ناستې موخه د پوهاوي لوړول او د بې ځایه شویو د لېږد څرنګوالی، په راتلونکي کې د مرستو برابرول او په دې برخه کې د هغې ادارې همکاري وه.
د وزارت د داخلي بې ځایه شویو وضعیت ته د رسېدنې رییس مولوي سردار شیرزاد وویل: اوس د هېواد په ټولو سیمو کې امنیت ټینګ شوی، اسلامي امارت او د مهاجرینو چارو وزارت غواړي چې د دوی د لېږد په برخه کې اسانتیاوې رامنځته کړي او پخپله خوښه راستنیدنه کې ورسره مرسته وکړي
هغه وويل: ٧٠ زره کورنۍ خپلو اصلي ځايونو ته د ستنېدو لپاره چمتو دي او له دې جملې څخه ٤٣ زره کورنيو د غوښتنليکونو فورمې ترلاسه کړې دي
هغه دغه راز وویل چې، له څو کلونو راهیسې په هېواد کې د جګړو او طبیعي پېښو له امله شاوخوا درې میلیونه کسان بې ځایه شوي دي
شيرزاد زیاته کړه: په کابل ولايت کې ۸ زره او ۲۳۰ کورنۍ خپلو اصلي ځايونو ته د ستنېدو لپاره چمتو دي
د کمیسیون استازو وویل: موږ کولای شو دا ستونزه له یو بل سره په همکارۍ او همغږۍ حل کړو
هغو په راتلونکي کې د بې ځایه شویو د لېږد د څرنګوالي په اړه د معلوماتو له ترلاسه کولو وروسته، د خپلې ادارې همکاري څرګنده کړه او ویې ویل: موږ به دا موضوع له ملاتړ کوونکو او همکارانو سره شریکه کړو
دواړو لوریو په راتلونکي کې پر لا زیاتو همکاریو او همغږۍ ټینګار وکړ
