کډوالو او راستنېدونکو چارو وزارت بېځايه شوو او راستنېدونکو ته د لاس رسي په برخه کې دوه هوکړه ليکونه لاسليک کړل
د کډوالو او راستنېدونکو چارو وزارت دملګرو ټولنيزې او پراختيايي او د بشري خيريه موسسو سره راستنېدونکو کورنيو ته د لاس رسي په موخه هوکړه ليکونه لاسليک کړل.
دغه هوکړه ليکونه د تېرې شنبې په ورځ د وږي په ۲مه د کډوالو چارو وزارت د پلان او پالېسۍ سرپرست مرستيال مهرخدا صبار او د يادو موسسو د مسولينو له لورې په دغه وزارت کې لاسليک شول.
د هغه هوکړه ليلک پر اساس چې د کډوالو وزارت او د ملګرو ټولنيزې او پراختيايي موسسې ترمنځ لاسليک شوی، دغه موسسه په کابل، لوګر او پکتيا ولايتونو کې د هغو ولايتونو د کډوالو چارو رياستونو په همغږۍ اړمنو راستنېدونکو کورنيو ته نغدې پيسې ووېشي.ددې پروژې ټول لګښت دوه ميلونه ۹۶۶ زره ۲۰۱ افغانۍ کېږي چې د خوراک نړيوال سازمان له لورې ورکول کېږي.
همدارنګه د بشري خيريه موسسې سره د يو هوکړه ليک پر بنسټ به په کندز ولايت کې ۲۷۰ بېځايه شوو او راستنېدونکو کورنيو ته د پاکو اوبو د زمينې برابرولو، د ۴۰ کورونو جوړولو او يو اندازه نغدو پیسو د وېشپه برخه کې همکاري کوي، ددې پروژې لګښت ۳۱ ميلونه ۸۸۲ زره ۷۶۵ افغانۍ کېږي چې د (CORD AID)ادارې لخوا ورکول کېږي.
