د کډوالو او راستنېدونکو چارو وزیر محترم مولوي عبدالکبیر د کډوالو په چارو کې د ملګرو ملتونو د عالي کمېشنرۍ له رییس عرفات جمال سره وکتل
په دغې ناسته کې، چې په روان زیږدیز کال کې راستنېدونکو ته د اړینو مرستو د رسولو او په اداري چارو کې د اسانتیاوو په اړه خبرې وشوې، عرفات جمال د کډوالو چارو وزارت همکارۍ وستایلې او زیاته یې کړه، چې په تېر زیږدیز کال کې یادې کمېشنرۍ ۲.۲ میلیونو راستنو شویو ته خدمات او مرستې وړاندې کړې دي.
د نوموړي پر وینا، چې د روان زیږدیز کال لپاره لومړیتوبونه او د کډوالو اړتیاوې په ګوته شوې او هغو ته په کتو به خپلې چارې تنظیم کړي.
ښاغلي عرفات جمال په افغانستان کې په دوامداره او اغېزمنه توګه د راستنېدونکو چارو ته د رسېدنې په موخه په اداري پړاونو کې د اساتنیاوو رامنځته کولو او ځینو شته ستونزو د حل اړوند وړانديزونه له محترم وزیر سره شریک کړل.
محترم مولوي عبدالكبير د کډوالو په چارو کې د ملګرو ملتونو د عالي کمېشنرۍ رییس او ورسره مل پلاوي ته ښه راغلاست وویل او له افغانانو سره یې د ملګرو ملتونو له مرستو مننه وکړه.
محترم وزیر د کډوالو او راستنېدونکو چارو ته د رسېدنې په موخه د امارتي او نړۍوالو بنسټونو تر منځ همغږي مهمه وبلله او په اړوندو چارو کې یې د همکارۍ ډاډ څرګند کړ.
د ناستې په پای کې محترم وزیر روان کال راستنو شویو ته د لاډېرو مرستو پر رسولو ټينګار وکړ.
