په کډوالو چارو وزارت کې دهر اړخيزو خبرو اترو لپاره دخلکو کمېټې ناسته جوړه شوه
د کډوالو او راستنېدونکو چارو وزارت د پناه غوښتونکو مرسيتالې ډاکټرې عالمې په مشرۍ په کډوالو چارو وزارت کې د هر اړخيزو خبرو اترو دخلکو کمېټې ناسته جوړه شوه.
دغه ناسته د تلې په ۲۱مه جوړه شوې وه پکې، په تهران کې د افغانستان د سفير مرسيتال عبدالقويم سليماني، ملي امنيت شورا دفتر استازي، ملي امنيت رياست، ماليې وزارت، بهرنيوچارو وزارت او دنفوسو داحوالو د ثبت ادارې استازو شتون درلود.
د يادې ناستې مهم موضوعات په ايران کې د کډوالو دمديرت څرنګوالی په ځانګړي توګه بې اسناد کډوالو ته د پېژندپاڼووېش او په هغه هېواد کې د دوی قانوني شتون وو.
په ناسته کې وويل شو، چې د ايران په ۲۰ ولايتونوکې به د راجسټريشن لپاره ۲۸ حوزې فعالې شي، ترڅو د افغان کډوالو پېژندنه او د پېژند پاڼو وېش رامنځ ته شي او د نفوسو د احوالو دثبت ادارې د پېژند پاڼو د وېش په موخه بشپړ چمتوالی اعلان کړ.
د پناه غوښتونکو مرسيتالې د اړوندو بنسټونو څخه غوښتنه وکړه، چې دخلکو کمېټه له نورو کمېټو سره توپير لري،ځکه دا د انسانانو برخليک سره سرو کارلري؛ نو بايد ټول اړند بنسټونه په دې برخه کې په رښتينې او جدي توګه همکاري وکړي، ترڅو په ايران کې دافغان کډوالو شتون قانوني کړي او له زيان څخه خوندي شي.
سليماني د کمېټو له غړو غوښتنه وکړه، چې په ايران کې مېشت افغان کډوالو چې ۴۵۰ زره لاسي ليکلي پاسپورتونه په ماشيني پاسپورتونو واوړي نو د غيرقانوني کډوالۍ مخه به ونيول شي.
