ټول دولتي او خصوصي پوهنتونونه دې راستنو شویو مهاجرینو زده کوونکو ته د زدکړو زمینه برابره کړي
د تخنیکي او مسلکي زده کړو ادارې له لورې د ١٤٠٣ ښونیز کال په پیل غونډه کې د مهاجرینو او راستنېدونکو چارو سرپرست الحاج خلیل الرحمان حقاني له ټولو دولتي او خصوصي ښوونځیو او پوهنتونونو وغوښتل، چې له ګاونډیو هېوادونو په زور رایستل شويو ډیریو زده کوونکو زده کړې نیمګړې پاتې شوي دي، دوی دې یې په وړیا ډول او په تخفیف سره د زدکړو لپاره جذب کړي او هغه مهاجرین، چې په نورو هېوادونو کې یې لوړې زدکړې او حرفې زده کړي د کار په برخه کې ورسره همکاري وکړي
ښاغلي حقاني په یاده غونډه کې د عصري علومو اړتیا ته په اشارې وویل، دغه ماشومان د سبا مشران او د هېواد سرنوشت ټاکونکي دي، دوی باید د وخت له غوښتنو سره سم په دیني او عصري علومو سنبال شي
نوموړي زیاته کړه، په علمي او زده کړیېزو ادارو کې باید د زده کړو کیفیت غښتلی شي، ترڅو نورو هېوادونو ته د محصلینو د تګ اړتیا پیدا نشي
