د کډوالو چارو وزير د بلخ ولايت دغاليو جوړونکو د ښارګوټي نه ليدنه وکړه
د کډوالو او راستنېدونکو چارو وزير سيد حسين عالمي بلخي د چنګاښ په ۲۶مه بلخ ولايت ته په خپل سفر کې د بلخ ولايت دغاليو جوړونکو د ښارګوټي نه ليدنه وکړه او دهغوی ستونزې يې واورېدې.
د غاليو جوړونکو د ښارګوټي اوسېدونکو دښاري او ټولنيزو خدماتو چمتو کولو لپاره دکډوالو چارو وزارت څخه مننه وکړه، يادونه يې وکړه چې د اوبو رسولو شبکه د کډوالو چارو وزارت ترمشرۍ لاندې جوړه شوې او دولتي برېښنا هم لري.همدارنګه د کرونا ويرس د خپرېدو پرمهال دکډوالو رياست له خوا تل دپوهاوي برنامې پر لاره اچول شوي او د نړيوالو مرستندويه ادوارو په همکارۍ د ښارګوټي په جوماتو او ګڼې ګوڼې ځايونوکې د اوبو ټانکونه او لاس مينځلو دستشويانې جوړې کړي.
دغه اوسېدونکي د ښارګوټي د ځمکې غصب يوه عمده ستونزه يادوي او د کډوالو اوراستنېدونکو چارو وزارت څخه يې ددغې ستونزې دحل او په ښارګوټي کې د جومات د ودانۍ د بشپړولو غوښتنه وکړه.
د کډوالو او راستنېدونکو چارو وزير سيد حسين عالمي بلخي د ښارګوټي د بېلابېلو برخو څخه ليدنه وکړه او د ښارګوټي د داخلي سړک په اړه يې دکډوالو رياست نه معلومات ترلاسه کړل، ژمنه يې وکړه، چې د وزارت په پلانونو کې به دجومات ودانۍ بشپړولو مسله هم شامله کړي.
د يادونې وړ ده، چې د کډوالو او راستنېدونکو چارو وزير دخپل سفر په لړ کې د بلخ ولايت له والي سره د عالۍ اوبدلو ښارګوټي د اوسېدونکو د ستونزو دحل په خاطر خبرې وکړې او له دې وړاندې يې د سوداګرۍ او صنعت سرپرست سره خبرې کړې وې.
