د کډوالو او راستنېدونکو چارو وزیر محترم مولوي عبدالکبیر د پکتیا ولایت د جهادي مدرسې په فراغت غونډه کې ګډون او وینا وکړه
محترم مولوي عبدالکبیر پکتیا ولایت ته د سفر په ترڅ کې د جهادې مدرسې د حدیثو د لویې دورې په فراغت غونډه کې د وینا پر مهال په هېواد کې پراخ امن د اسلامي نظام لاسته راوړنه وبلله او د اسلامي امارت واکمني یې د افغان ولس لویه هیله یاده کړه.
محترم وزیر زیاته کړه، چې تر شل کلنۍ مبارزې وروسته، چې مهم هدف د اشغال خاتمه او د اسلامي نظام قیام و، الحمد الله دواړه موخې ترلاسه شوې دي.
ښاغلي وزیر د هېواد په ګوټ ګوټ کې د دیني زده کړو د اسانتیاوو برابرول د اسلامي امارت مهم خدمت وباله او زیاته یې کړه، چې افغانان له هېواد بهر د دیني زده کړو لپاره سفر ته اړ نه دي.
محترم مولوي عبدالکبیر د اشغالګرو د تېریو له امله مهاجرت ته په اشارې وویل، چې افغانانو د اسلامي ارزښتونو او افغاني عنعناتو د خوندي ساتلو لپاره د خپلو سرونو او مالونو قرباني ورکړه او مهاجرت ته اړ شول.
محترم وزیر پر نړیوالو او ګاونډيو هېوادونو غږ وکړ، چې له مهاجرینو سره له زور زیاتي ډډه وکړي او اجازه دې ورکړي، چې په داوطلبانه ډول خپل هېواد ته راستانه شي.
ښاغلی وزیر د کونړ په زلزله کې د هېوادوالو مرستو ته په اشارې سره د افغانانو د خپلمنځي یووالی ستاینه وکړه او د هېواد د پرمختګ لپاره یې د هغوی یو موټي کېدل اړین وبلل.
محترم وزیر د وینا په پای کې یو ځل بیا فارغو شویو ځوانانو ته مبارکي وویله او یادونه یې وکړه، چې افغان ولس روزل شویو ځوانانو ته اړتیا لري.
