د پناه غوښتونکو مرستيال په افغانستان کې د ترکيې د سرې مياشتې له رئيس سره ليدنه وکړه
د کډوالو او راستنېدونکو چارو وزارت د پناه غوښتونکو مرستيال وفي الله کاکړ په افغانستان کې د ترکيې د سرې مياشتې له رئيس فاتح آيتکين سره ليدنه وکړه اود ترکيې څخه راستنېدونکو کډوالو ته د لاسرسي او د دواړو ادارو په لا زياتې همغږۍ يې خبرې وکړې.
په دغه ناسته کې چې د ليندۍ په ۲۲مه په کډوالو وزارت کې ترسره شوه د ترکيې څخه د راستنېدونکو افغان کډوالوپه پالېسۍ کې داصلاحاتو راوستو په اړه خبرې وشوې.
په ناسته کې ښاغلي کاکړ د ترکيې د سرې مياشتې د رئيس د غوښتنې په ځواب کې وويل: (( ددې پالېسۍ له تخنيکي ناستې او بياکتنې وروسته، به دوی ددې پالېسۍ په سرليک کې اړين بدلونونه شامل کړي)).
د پناه غوښتونکو مرستيال په وروستيو کې د ترکيې سرې مياشتې له خوا دکډوالو او راستنېدونکو په برخه کې د افغانستان حکومت سره د څوکلنو همکاريو له امله مننه وکړه.
