د پاکستان سفیر د مهاجرینو چارو له سرپرست وزیر سره ولیدل
په کابل کې د پاکستان سفیر ښاغلي عبیدالرحمن نظاماني د مهاجرینو او راستنېدونکو چارو له سرپرست وزیر الحاج خلیل الرحمن حقاني سره د هغه د کار په دفتر کې ولیدل
په دغه ناسته کې په پاکستان کې د میشتو مهاجرینو په ستونزو، مشکلاتو او د هغې په حللارو خبرې وشوې
د مهاجرینو چارو وزیر په پاکستان د مهاجرینو د مختلفو ستونزو یادونه وکړه او له پاکستان هېواد یې وغوښتل، چې د ګاونډیتوب اصل ته په کتو باید مهاجرین په اجباري توګه ونه باسي او نه یې وځوروي
نوموړي همدا راز له یاد هېواد څخه د مهاجرینو په هکله د یوې ګډې او جامع تګلارې غوښتنه وکړه، ترڅو د مهاجرینو راتلونکی روښانه او په اړه یې دقیق تصمیمونه ونیول شي او په هیڅ وخت کې مهاجرین د سیاستونو قرباني نشي
ښاغلي حقاني په تورخم او سپین بولدک کې هم د ځینو ستونزو یادونه وکړه او په تګ راتګ کې د اسانتیاو رامنځته کولو غوښتنه یې وکړه
ښاغلي نظاماني په خپلو خبرو کې وویل: باثباته او مترقي افغانستان د پاکستان او سیمې هېوادونو په ګټه دی او کوم مسایل چې د خبرو له لارې د حل وړ وي باید ګډې ناستې پرې وشي
نوموړي زیاته کړه، مهاجرین زمونږ خپل وروڼه او خویندې دي او ددوی ستونزو ته رسیدګي زمونږ دیني او اخلاقي مسؤلیت دی
ښاغلي نظاماني ژمنه وکړه، چې یادې شوې ستونزې به له خپلې رهبرۍ سره شریکې او د حل لپاره به یې کوټلي ګامونه پورته کړي
