د وزارت سرپرست وزیر د بدخشان ولایت د ادارو او د موسساتو له مسؤولینو سره ناسته وکړه

د مهاجرینو او راستنېدونکو چارو وزارت سرپرست الحاج خلیل الرحمن حقاني د بدخشان له والي قاري محمد ایوب خالد او د دغه ولایت د مؤسسو له استازو سره د مرغومي پر لومړۍ نېټه ګډه ناسته وکړه، په دې غونډه کې سرپرست وزیر وویل: بنسټیزې پروژې دې پلي شي او کاري فرصتونه دې رامنځته شي، نوموړي د مهاجرینو د ستونزو د هواري په برخه د هغوی د غوره خدمتونو او کړنو ستاینه وکړه او زیاته یې کړه؛ د لا نورو مرستو راټولول د دې ولايت د مسؤولانو له مهمو مسؤوليتونو څخه ګڼل کېږي؛
د بدخشان والي د مهاجرينو له پاره د ترسره شويو هڅو په اړ خپل معلومات وړاندې کړل او ويې ویل: موږ او تاسو هر يو مسؤوليت لرو، همدا د خدمت فرصت دى او اوس زموږ او ستاسو له پاره په دغه نظام کې د خدمت کولو فرصت برابر شوی دی، په دې غونډه کې د واخان ولسوالۍ د سرحدي آمریت د فعالیتونو د پیل په اړه هم خبرې وشوې.
همدا راز ښاغلي حقاني د بدخشان ولایت د مهاجرینو چارو ریاست څخه لیدنه وکړه او له کارمندانو سره یې د چارو په اړه خبرې وکړې، ښاغلي حقاني وویل :له تعصب څخه ډډه وکړئ، ترسره شوې قربانۍ یوازې د اسلامي نظام د ټینګښت له پاره وې او په دې برخه کې باید په پوره اخلاص او رښتېنولۍ خدمت وکړو.
نوموړي له کارمندانو څخه وغوښتل، چې خپل ځانونه له اسلامي شريعت سره برابر کړي او په خپلو کارونو کې شرعي احکام او اصول په پام کې ونيسي.