د مهاجرینو وزارت پلاوي د بلخ ولایت د مهاجرینو ریاست څخه لیدنه وکړه
د مسلکي مرستیال مولوي عبدالرحمن راشد په مشرۍ د مهاجرين چارو وزارت پلاوي د بلخ ولایت د مهاجرینو چارو ریاست څخه لیدنه وکړه او ددغه ولایت د ریاست د کارکوونکو، بېځايه شوو، راستنېدونکو او اړمنو ستونزې او ننګونې یې واورېدې.
ښاغلي راشد وویل، بلخ ولایت یو له هغو ولایتونو څخه دی چې د تېرو جګړو، ناامنیو او طبيعي پېښو له امله ورته د بلابېلو ولایتونو او سيمو څخه زيات شمېر مهاجر راکډه شوي، لله الحمد اوس مهال په ټول هېواد کې سوله او امنیت دی او د ملي او نړیوالو مرستندیه بنسټونو مو داغوښتنه ده،چې په نږدې او لېرو پرتو ولسوالیوکې په ډاډه زړه راستنېدونکو، داخلي بېځايه شوو او اړمنو کورنیو سره د مهاجرينو چارو ریاست تر څارنې لاندې په ګډې همکارۍ او همغږۍ بشري مرستې ووېشي.
هغه همدا راز د رياست ټولو کار کوونکو ته لارښوونه وکړه، چې مراجعينو سره دې د اسلامي اوانساني همدرۍ له مخې نيکه رويه وکړي، خپل فعاليتونه او کړنې دې په شفافه او عادلانه توګه تر سره کړي او مرستندویه بنسټونه دې، دې ته وهڅول شي چې بېځايه شو او اړمنو کورنیو سره خپلې بشري مرستې لا زیاتې کړي ترڅو ټولې مستحقې کورنۍ دمرستو څخه برخمنې شي.
په پای کې د بلخ ولایت د مهاجرينو چارو رييس مولوي اسد الله وفا د یاد ریاست د فعالیتونو او تر سره شووکړنو په اړه د وزارت پلاوي ته معلومات ورکړل.
