د کډوالو او راستنېدونکو چارو وزیر محترم مولوي عبدالکبیر د بشري مرستو د همغږۍ په برخه کې د یوناما له مرستیال اندریکا راتوته سره وکتل
په دې ناسته کې راستنو شویو افغانانو ته د مرستو رسولو او د اړوندو چارو پر وړاندې د شته خنډونو د حل په اړه خبرې وشوې. د یوناما مرستیال ښاغلي اندریکا راتوته د کډوالو چارو وزارت له همکارۍ او له اغېزمن کار څخه په خوښۍ وویل، چې روان زیـږدیز کال د ملګرو ملتونو ادارو د افغان کډوالو د ستونزو د حل په موخه دوه نیم میلیارده امریکايي ډالره مصرف کړي دي، چې دا له افغانانو سره د ملګرو ملتونو د مرستو ژمنتیا په ډاګه کوي.
ښاغلي راتوته د ملګرو ملتونو د معلوماتو پر بنسټ زیاته کړه، چې د کډوالو د بېرته راتګ له امله په لنډه موده کې د افغانستان د وګړو شمېر لس سلنه ډېر شوی، چې د اسلامي امارت او ملګرو ملتونو په هڅو وضعیت په ښه ډول مدیریت او له ناورین څخه مخنیوی شوی دی.
د بشري مرستو د همغږۍ په برخه کې د یوناما مرستیال د کډوالو او بېځایه شویو په برخو کې د اسلامي امارت له ادارو سره پر لاډېره همکارۍ او همغږۍ ټينګار وکړ او یادونه یې وکړه، چې د راتلونکی کال لپاره د کډوالو د اړتیاو مشخصولو په موخه به له کډوالو چارو وزارت سره ګډ کار ته دوام ورکړي.
نوموړي د خپلو خبرو پر دوام په هېواد کې د کډوالۍ د دایمي حل د مسودې پر چارو خوښي څرګنده کړه او دغه راز یې له پاکستان څخه افغانستان ته د ملګرو ملتونو د بشري مرستو پر رالېږد خپل وړانديزونه له محترم وزیر سره شریک کړل.
محترم مولوي عبدالکبیر ښاغلي اندریکا راتوته او ورسره مل پلاوي ته ښه راغلاست وویل او له افغانانو سره یې د ملګرو ملتونو له مرستو مننه وکړه.
محترم وزیر زیاته کړه، چې اسلامي امارت په روان ژمي کې له راستنو شویو سره د بېړنیو مرستو پلان چمتو کړی، چې په ټول افغانستان کې به پلی شي او په هر ولایت کې به له زرو کورنیو سره د خوراکي توکو ترڅنګ نغدي مرسته هم وشي.
محترم مولوي عبدالکبیر زیاته کړه، چې د کډوالو چارو وزارت د اهل خیر خلکو په همکارۍ راستنو شویو ته د مرستو لړۍ پیل کړې او تمه یې څرګنده کړه، چې زرګونو کورنیو ته به اړتیا وړ خوراکي مواد ورسېږي.
د ناستې پر دوام محترم مولوي عبدالکبیر د خوړو او سرپناه په برخه کې د راستنو شوو د ستونزو اړوند موضوع ګانې د یوناما له مرستیال سره شریکې کړې او یادونه یې وکړه، چې د یوناما پر وړاندیزونو به غور وکړي.
