پکتیا: ګردې څېړۍ کې ٣٠ کلنه دښمني په دوستۍ بدله شوه
د پکتیا ولایت، ګردې څېړۍ ولسوالۍ اړوند، توريخېلو سیمه کې ددوو کورنیو ترمنځ ٣٠ کلنه دښمني، چې په تېر کې د قتل له امله رامنځته شوې وه، د مهاجرینو او راستنېدونکو چارو وزیر په مشرۍ د علماو او قومي مشرانو د مسلسلو هڅو په پایله کې په دوستۍ بدله شوه
د روغې جوړې په دغو مراسمو کې د مهاجرینو چارو وزیر وویل: موږ دغه لړۍ په ټولو ولایتونو کې روانه کړې ده او د قومونو او کورنیو ترمنځ ټولې شخړې به د افغاني دود له مخې د جرګو او مرکو له لارې حل کوو
ښاغلي حقاني وویل: هیڅوک په شخصي ډول په چا د تجاوز، انتقام او لارو بندولو حق نه لري، هره موضوع چې راپیدا کېږي، حللاره یې صلح او یا شرعي محکمه ده
د سیمي خلکو یاده روغه جوړه لویه لاسته راوړنه وبلله او په دې برخه کې یې د مهاجرینو چارو د سرپرست وزیر هڅې وستایلې
