د مهاجرینو وزارت اړوند ټولو رئیسانو ته یو ورځینی روزنیز ورکشاپ ورکړل شو
یکشنبه ۲۸ لیندۍ/ ۱۴ جمادى الأولى ۱۴۴۳
د مهاجرينو وزارت لخوا د وزارت اړوند ټولو مرکزي او ولایتي مسولينو ته په اداري چارو کې علمي سمينار ورکول شو.
په پیل کې د وزارت مرستيال محمد ارسلاح خروټي د سمينار پيليزه وينا وکړه د غونډې ګډونوالو ته يې ښه راغلاست ووايه، د ولايتونو مسوولينو ته يې د کاري فعاليتونو اړوند لازمې لارښوونې وکړې او غوښتنه يې وکړه چې ټولې چارې په ښه روڼتيا او شفافيت ترسره کړي اوپه هر ډول حالاتو کې د خپل ولس او مهاجرينو خدمت وکړﺉ؛ ټول کارونه مو په اصولو برابر ، دروازې مو د هرچا پرمخ خلاصې کړﺉ او دخپلو هېوادوالو سره ښه رویه وکړئ.
د سمينار په جریان کې د وزارت مقام د دفتر رئیس محمود الحق احدي لخوا د سمينار ګډونوالو ته د ادارې او اداري کارونو اړوند معلومات ورکړل شو.
وروسته د پناه غوښتونکو معين قاري محمود شاه د کارونو د شفافيت په اړه وينا وکړه او ويې ويل چې اداره او رياست کول پخپله عبادت دی، ددې سره يې د فساد او خيانت موضوع د اسلامي شريعت له نظره واضحه کړه.
ورپسې د داخلي بې ځايه شويو رييس مولوي سردار محمد شېرزاد دسمينارګډونوالو ته خپله وينا وکړه دادارې په اړه یې تخنيکي معلومات وړاندې کړل اواداره یې په خپله یولوی مسؤلیت وباله.
د کابل ولايت د مهاجرينو او راستنېدونکو چارو رئيس قاري عبدالمتين رحيمزي د سروې او دمرستو دوېش د شفافيت او روڼتيا په اړه اړين او ګټور معلومات د سمينار ګډونوالو ته وړاندې کړه.
همدارنګه د بشري سرچينو ريس قاري حمدالله حقاني د تقرر او ګمارنې په هکله معلومات وړاندې کړل.
په یاد علمي سمینارکې د مهاجرينو وزارت سرپرست وزير الحاج خليل الرحمن حقاني هر اړخيزه وينا وکړه او ټول مسوولين يې خپلو مسوولیتونو ته متوجه کړل. ددې ترڅنګ يې ګډونوالو ته د رياست الوزرا او اميرالمومنين لارښونې واورولې او په کلکه يې د عملي کېدو غوښتنه وکړه.
وروسته ډاکټر فاروق اعظم خبرې وکړې ويې ويل، افغانان د نړيوالو زبر ځواکونو له لخوا هجرت ته اړ شوي، ددې ترڅنګ يې د مهاجرينو د ستونزو يادونه وکړه او د حل په موخه يې خپل نظر د مسوولينو سره شريک کړ.
په پای کې دمهاجرینو او راستنېدونکو چارو وزارت ولايتونو مسوولينو په خپل وار سره خپل کاري فعاليتونه، لاسته راوړنې او ستونزې د وزارت د مقام سره شريکې کړې.
