د غور ولایت د مهاجرینو او راستنېدونکو چارو آمر د RRSWO موسسې له استازو سره وکتل
د غوایي میاشتې په ۳۰ مه نیټه د غور ولایت د مهاجرینو او راستنېدونکو چارو آمر انجینر میراحمد مصمم د راه رهنورد ټولنیزې هوساینې موسسې (RRSWO) له عمومي ريیس سراج الدین غفوري سره وکتل.
په دې لیدنه کې د RRSWO موسسې له لوري په ۱۴۰۳ کال کې د کډوالو لپاره د ژمنیو جامو وېش او د سېلاب ځپلو لپاره په نوي ښارګوټي کې د ۸ تشنابونو د جوړولو او د اوبو ټانکرونو د وېش او ستونزو په اړه خبرې وشوې.
د یادې موسسې استازو وویل، چې ډېر ژر به د غور ولایت د کډوالو ادارې په همغږۍ په یاد ولایت کې لومړني سروې پیل کړي؛ ترڅو د هغو راستنېدونکو اړتیاوې معلومې کړي، چې له ایران څخه اخراج شوي دي.