د کډوالو او راستنېدونکو چارو سرپرست وزیر محترم مولوي عبدالکبیر په جلاجلا ناستو کې د نورستان له والي محترم قاري زین العابدین عابد او د خوست د پوهنې له رئیس مولوي فیض الله جمال سره وکتل.
په پیل کې د نورستان والي ښاغلي زین العابدین عابد په یاد ولایت کې د کډوالو د وضعیت او د هغوی د وړاندیزونو په اړه محترم مولوي عبدالکبیر ته معلومات ورکړل او زیاته یې کړه، چې په دغه ولایت کې مهاجرینو ته د اسانتیاوو چمتو کولو په موخه له اړوندو حکومتي او مرستندویه اداره سره همغږي رامنځته شوې ده.
ښاغلي عابد، د نورستان د ولسونو د ستونزو د حل په برخه کې د مهاجرینو او راستنېدونکو چارو د وزیر د هڅو په یادولو سره وویل، چې علمای کرام او ولسونه د اسلامي امارت لخوا د هغوی د ستونزو د حل له امله خوښ دي.
دغه راز مولوي فیض الله جمال په خوست ولایت کې مهاجرینو ته د زده کړو د چمتو کولو پر څرنګوالي خبرې وکړې او په وینا یې، چې د کډوالو لپاره په ښوونځيو او مدارسو کې د زده کړو زمینه برابره شوې ده. هغه وویل، له نړیوالو ادارو سره په اړیکه کې دي څو کډوالو ته د زده کړو په برخه کې لازمې اسانتیاوې رامنځته کړي.
د کډوالو او راستنېدونکیو چارو سرپرست وزیر محترم مولوي عبدالکبیر، اسلامي نظام او ولس ته د خدمت په برخه کې د امارتي چارواکو او مسوولینو د هڅو په ستایلو سره وویل، چې افغانانو د څو لسیزو جګړو او یرغلونو له امله ګڼې ناخوالې لیدلې دي او اسلامي امارت د ولس د هوسا ژوند لپاره هڅې کوي.
د محترم وزیر په وینا، چې افغان کډوالو ته اسانتیاوې چمتو کول د اسلامي امارت لومړیتوب دی او د مهاجرینو پر وړاندیزونو او غوښتنو به غور وشي.
