په غزني ولایت کې راستنېدونکو کډوالو لپاره د ۲ نمبر ښارګوټي پرانیسته وشوه
دغزني ولایت مرکز کې د راستنېدونکو کډوالو لپاره د ۲ نمبر ښارګوټي پرانیسته د لوړپوړو چارواکو په ګډون وشوه، چې پکې شاوخوا ۶ رزه جریبه ځمکه د کډوالو لپاره ځانګړې شوې او د استوګنې لپاره به په روڼ ډول ووېشل شي.
په دې مراسمو کې د افغانستان اسلامي امارت د رئیسالوزرا اداري مرستیال مولوي عبدالسلام حنفي، د کور او ښار جوړولو وزیر مولوي حمدالله نعماني، د غزني والي ملا عبدالصمد جاوید او یو شمېر نورو چارواکو، قومي مشرانو او ځوانانو ګډون درلود.
په یادهو مراسمو کې مولوي عبدالسلام حنفي زیاته کړه: د ۶ زره جریبو ځمکې د وېش لړۍ به پیل او په شفاف ډول به کډوالو ته ووېشل شي.
د غزني امنیه قوماندان مولوي مخدوم محمدعالم وویل: دا د خوشالۍ ځای دی، چې هېواد مو خپلواک او امن دی او د کډوالو ستونزو ته به رسېدنه وشي. د کور او ښار جوړولو وزیر مولوي حمدالله نعماني وویل، هرې کورنۍ ته د غړو د شمېر له مخې ۵ تر ۱۵ بیسوې ځمکه ورکول کېږي.
د غزني د کډوالو چارو رئیس مولوي مطیع الله عرب وايي، تر اوسه ۲ زره او ۵۰۰ کورنۍ ثبت شوې او لومړنۍ اړتیاوې یې پوره شوې دي.