په پکتیکا ولایت کې د مهاجرینو ښارګوټی پرانیستل شو
د غوایي میاشتې په ۱۷ مه نیټه د پکتیکا ولایت په مرکز ښرنه کې د راستنېدونکو کډوالو لپاره د استوګنې ښارګوټي پرانیسته غونډه وشوه. په دې مراسمو کې د رئیسالوزرا مالي او اداري مرستیال مولوي عبدالسلام حنفي، د کور او ښار جوړولو وزیر مولوي حمدالله نعماني، د پکتیکا والي ملا عبدالخالق عابد، مرستیال والي مخدوم عبدالسلام سعادت او یو شمېر نورو چارواکو او قومي مشرانو ګډون درلود.
مولوي عبدالسلام حنفي، په خپلو خبرو کې وویل، چې ۳۵۰۰ جریبه ځمکه د کډوالو لپاره ځانګړې شوې، چې په پوره روڼتیا به ورته ووېشل شي.
د پکتیکا والي وویل: دا ښارګوټی د ښرنې ختیځ لوري ته په ۵ کیلومترۍ کې جوړ شوی او ټولو کډوالو ته به پکې حقوق ورکړل شي. د کور او ښار جوړولو وزیر وویل، هرې کورنۍ ته د غړو د شمېر له مخې ځمکه ورکول کېږي. د یاد ولایت د کډوالو رییس مولوي حمدالله فاتح وویل، تر اوسه ۲۱۰۸ کورنۍ ثبت شوې او لومړنۍ اړتیاوې یې پوره شوې دي.