د مهاجرینو وزیر مولوي عبدالکبیر په جلا جلا ناستو کې د قطعه خاص د رییس ارکان محمد صابر انس، د هرات ولایت د اسلام قلعه د کډوالو چارو امریت امر عبدالله قیومي او د خوست ولایت د ګربزو ولسوالۍ له قومي مشرانو سره وکتل.
د کډوالو او بېرته راستنېدونکو چارو سرپرست وزیر محترم مولوي عبدالکبیر په جلا جلا ناستو کې د قطعه خاص د رییس ارکان محمد صابر انس، د هرات ولایت د اسلام قلعه د کډوالو او بېرته راستنېدونکو چارو امریت امر عبدالله قیومي او د خوست ولایت د ګربزو ولسوالۍ له قومي مشرانو سره وکتل.
په دې ناستو کې د قطعه خاص رییس ارکان محمد صابر انس وویل، د کډوالو چارو د خوندي مدیریت او د راستنېدونکو هېوادوالو د اسانتیاوو لپاره زموږ ټیمونه هر اړخیز اقدامات ترسره کړي دي او هڅه کوي چې د نظم، خدماتو او امنیت په برخه کې لا زیات کار وکړو.
د اسلام قلعه د کډوالو چارو امریت امر د خپل امریت د کړنو راپور وړاندې کړ او څرګنده یې کړه، چې په اسلام قلعه کې تر اوسه ۵۰۰ کورنیو ته د ابتدايي استوګنځیو تر څنګ د یو مسجد چارې هم بشپړې شوي دي. هغه زیاته کړه، چې زموږ ټول کارکوونکي د خپل اخلاص او ژمنتیا له مخې د هېوادوالو خدمت ته چمتو دي. همداراز، د ادارې د لا ښه تنظیم او خدمتونو د پراخوالي په موخه د یاد امریت ځینې ستونزې او وړاندیزونه هم له محترم مولوي صاحب سره شریکې کړې.
د ناستو په پای کې د کډوالو او بېرته راستنېدونکو چارو سرپرست وزیر محترم مولوي عبدالکبیر وویل؛ د هېوادوالو خدمت زموږ د اسلامي او ملي مسؤولیت یوه مهمه برخه ده. موږ هڅه کوو چې راستنېدونکو کډوالو ته د سرپنا، خوراک، روغتیايي خدماتو او نورو اسانتیاوو په برخه کې لا زیات اقدامات وکړو. د هغه په وینا د اسلام قلعه د امریت د ستونزو او وړاندیزونو ارزونه او غور به کوي.
