د مهاجرینو او راستنېدونکو چارو وزارت اداري ناسته وشوه
د مهاجرینو او راستنېدونکو چارو وزارت اونیزه اداري ناسته د وزارت د سرپرست وزیر الحاج خلیل الرحمن حقاني او د مالي او اداري او مسلکي مرستیالانو او د مرکزي رییسانو په شتون کې وشوه.
ناسته د قرانکریم د څو مبارکو آیتونو په تلاوت سره پیل شوه او د تېرې ناستې د لارښوونو او پرېکړو په تعقیب، د روغنیاتو د معتمد د ګمارنې د تضمین، د روغتیایي آمریت د ودانۍ، د هلمند ولایت د بهرامچه سرحدي آمریت د اړتیاوو، د پنجشیر ولایت د مهاجرینو آمریت د لوازمو او اړتیاوو، د هیواد شمالی ولایتونو ته د وزات د مسلکي مرستیال مولوی عبدالرحمن رشید د سفر راپور، د دویمو واحدونو د انجینرۍ برخې د حق الزحمې او د وزارت د امنیتي محافظینو د ستونزو په اړه خبرې وشوې.
ښاغلي حقاني د غوره نظم او ډسپلین، د دندو د صادقانه ترسراوي، له نبوي سيرت سره سم د سيرت او صورت او دندې پابندۍ، د الهي احکامو او شرعي نظام د پلي کولو سپارښتنې وکړې او دغه راز نوموړي د روڼتیا، صداقت او کارونو د ګړندیتوب په برخه کې د مسولانو د لا پاملرنې غوښتنه وکړه.
