د چین سفیر د مهاجرینو چارو له سرپرست وزیر سره ولیدل

په کابل کې د چین هیواد سفیر ښاغلي ژاوشینګ د مهاجرینو او راستنېدونکو چارو وزارت سرپرست الحاج خلیل الرحمان حقاني سره د هغه د کار په دفتر کې ولیدل.
په ناسته کې د مهاجرینو چارو وزیر د چین او افغانستان ترمنځ مثبتې اړیکې وستایلې او له مهاجرینو سره د چین هېواد مرستو د لومړنۍ جوپې د رسېدو له امله یې له دغه هېواد څخه مننه وکړه.
ښاغلي حقاني همدا راز د وروستیو سیلابونو له امله د اووښتو زیانونو معلومات له نوموړي سره شریک کړل او غوښتنه یې وکړه، چې د راستنو شوو مهاجرینو ترڅنګ د طبیعي او غیر طبیعې پېښو له امله بېځایه شوو افغانانو سره د کور جوړونې، کار موندنې او زده کړو ته د زمینې د برابرولو په برخه کې مرستې وکړي.
د چین سفیر د وروستیو سیلابونو، چې له امله یې په بغلان، غور او یو شمېر نورو ولایتونو کې درانه ځاني او مالي زیانونه اوښتلي وو؛ ژوره خواشیني څرګنده کړه او ډاډ یې ور کړ، چې د چین هیواد د خپلو امکاناتو په محدوده کې چمتو دی، چې له دغو سیلاب ځپلو سره هر ډول مرستې وکړي.
نوموړي طبیعي پېښو ته د اسلامي امارت د ښه رسیدګۍ او غوره مدیریت ستاینه وکړه او ډاډ یې څرګند کړ، چې ددغه هېواد نورې مرستې به هم تر راتلونکي جولایي میاشتې پورې راورسېږي.