د میز په سر لاپې نه وهو، څومره امکانات چې په واک کې لرو د سیلاب ځپلو لاسنیوی پرې کوو

د مهاجرینو او راستنېدونکو چارو سرپرست وزیر الحاج خلیل الرحمن حقاني بغلان ولایت ته د خپل سفر په ترڅ کې د مرکزي بغلان، نهرین او برکي سیمو له سیلاب ځپلو سره په ناسته کې وویل: د ټولو ملکي او نظامي ادارو کاري ټیمونه لاس پکار دي او چمتو دي، چې ټولو زیانمنو سیمو ته خپل خدمات ورسوي
ښاغلي حقاني د سیلابونو له امله زیانمنو شوو کورنیو ته ډاډ ورکړ، چې اسلامي امارت ستاسو ترڅنګ ولاړ دی، "موږ یوازې د میز په سرلاپې نه وهو، بلکې څومره امکانات چې مونږ یې په لاس کې لرو د زیانمنو کورنیو لاسنیوی پرې کوو"
نوموړي په خپلو خبرو کې د هېواد له شتمنو، تجارانو او ټولو خیریه بنسټونو وغوښتل، چې د بغلان ولایت زیان ګالو کورنیو مرستې ته راودانګي او په هره برخه کې توان لري باید ددوی لاسنیوی وکړي
د یادونې وړ ده، چې د اسلامي امارت د نورو ادارو ترڅنګ د مهاجرينو او راستنېدونکو چارو وزارت سرپرست، او د یو شمیر ریاستونو رئیسان او کاري پرسونل ټول د بغلان ولایت سیلابځپلو سیمو کې حضور لري او زیانمنو کورنیو ته خپل خدمات ترسره کوي