د مهاجرینو او راستنېدنکو چارو وزارت هیات د بلخ ولایت د مهاجرینو او راستنېدونکو ریاست څخه لیدنه وکړه
د مهاجرینو او راستنېدنکو چارو وزارت د حقوقي ملاتړ ریاست رییس الحاج غلام نبي الله داد خیل ستانکزي په مشری یو هیات بلخ ولایت ته د نویو راستانه شویو مهاجرینو د حقوقي ستونزو د ارزونې په موخه تللی دی.
بلخ ولایت ته استول شوي هیات د مهاجرینو او راستنېدونکو ریاست اړوند اداري خدمتونو ترڅنګ؛ مراجعینو ته د خدماتو د وړاندې کولو کړنې ارزولې او عملاً یې د راستنېدنکو مهاجرینو ستونزې په مرکز او څو ولسوالیو کې له نږدې څارلې دي.
د یاد هیات مشر ښاغلي ستانکزي د مهاجرینو ریاست کارکوونکو ته په اداري جلسه کې ځینې لارښونې کړې او ویلي یې دي، چې هېوادوالو ته په پوره اخلاص، صداقت او امانتدارۍ سره کار وکړئ او په دې یې ټینګار کړی، چې په مرستو او سروې کې دي لومړیتوب په جبري ډول راستنو شویو مهاجرینو او بیا دې په خپله خوښه راستنېدونکو او نورو مستحقینو ته ورکړلی شي.
د بلخ ولایت د مهاجرینو ریاست د داخلي بېځایه شویو آمر مولوي جمعه الدین خبرې وکړې او د ستانکزي په راتګ یې خوښي څرګنده کړه او د مهاجرینو، بې ځایه شویو او راستنېدونکو د حقوقي مسایلو په اړه یې ور سره بحثونه لو مشورې شریکې کړې.
