راستنېدونکو صنعت کارانو، سوداګرو او پانګه والو ته د اسانتیا برابرولو کمېټې پر کړنلار غونډه وکړه
د صنعت او سوداګرۍ د مرستیال وزیر مولوي قدرت الله جمال تر مشرۍ لاندې راستنېدونکو صنعت کارانو، سوداګرو او پانګه والو ته د اسانتیا برابرولو کمېټې غړو پر کړنلار د بحث په موخه ناسته وکړه.
دې ناسته کې چې د اړوندو وزارتونو او ادارو غړو استازیو برخه اخیستې وه، د دې کمېټې د کړنلارې مسوده بند پر بند تشریح او تصحیح شوه.
ټاکل شوې چې یاده کمېټه په نږدې راتلونکې کې عملاً ګام پورته کړي، چې په وسیله به یې راستنېدونکو صنعت کارانو، سوداګرو او پانګه والو ته د فعالیت برخه کې اسانتیاوې او مناسبه زمینه برابره شي.
دا کېمټه چې مشري یې د صنعت او سوداګرۍ وزارت د سرپرست وزیر الحاج نورالدین عزیزي پر غاړه ده، پکې د کرنې، اوبو لګولو او مالدارۍ، کډوالو او راستنېدونکو چارو، مالیې او کورنیو چارو وزاتونو، د استخباراتو لوی ریاست او مرکزي بانک استازي غړیتوب لري.
