بګرام د بني ورسک مهاجرینو ښارګوټي کې د نجونو ښوونځی ګټې اخستنې ته وسپارل شو
د پروان ولایت، بگرام ولسوالۍ، د بني ورسک د مهاجرینو ښارګوټي کې ددغه ولایت د مهاجرینو او راستنېدونکو چارو ریاست په هلو ځلو او د یونیسار ادارې په مالي مرسته د نجونو ۱۲ صنفي ښوونځی ګټې اخستنې ته وسپارل شو
ددغه ښوونځي په پرانست غونډه کې د مهاجرینو او راستنېدونکو چارو وزیر الحاج خلیل الرحمان حقاني وویل: مونږ هڅه کوو، د مهاجرینو په ټولو ښارګوټو کې مکتب، کلینیک، برق، پاکې اوبه او سړکونو سربېره د ژوند ټول سهولتونه برابر کړو
ښاغلي حقاني د نجونو او هلکانو په دیني او عصري زدکړو ټینګار وکړ، او زیاته یې کړه، په مکتبونو کې باید شاګردانو ته د خپل دین، هېواد او خپلو ملي ارزښتونو په اړه پوهاوی ورکړل شي، ترڅو بل څوک یې د خپلو ارزښتونو پرضد استعمال نکړي
نوموړي زیاته کړه، د مهاجرینو حقوق به نه ضایع کېږي او هرچا چې د مهاجرینو ځمکې غصب کړي دي، ژر به بیرته ترې راوګرځول شي .
