مسلکي مرستيال په کابل کې د ملګرو ملتونو له مرستيالې سره ليدنه وکړه
د مهاجرينو چارو وزارت مسلکي مرستيال مولوي عبدالرحمن راشد په افغانستان کې د (UNHCR) دفتر د رئيس له مرستيالې ميرمن يوميکو سره په خپل کاري دفتر کې وليدل.
په ناسته کې د افغانستان، ايران، پاکستان او (UNHC) دفتر د مخکينۍ څلور اړخيزې ناستې ، د تخنيکي کمېټې د دندو د لايحې د ترتيب، د ګډو فعاليتونو د پلي کېدو د پلان او د مهاجرينو چارو وزارت سره د (۲۰۲۳) کال د ګډ هوکړه ليک اړوند خبرې وشوې.
اغلې يوميکو د تخنيکي کمېټې د جوړېدو، عملي فعاليتونو، د هغه د ملاتړ، په افغانستان کې د ياد دفتر د پلانونو په ځانګړي توګه د مهاجرينو او راستنېدونکو د ستونزو په اړه خبرې وکړې ويې ويل، موږ بايد داسې نوښتونه ولرو، چې د ګډو همکاريو د پياوړتيا لپاره زمينه ساز وي.
هغې زياته کړه، چې د (UNHCR) دفتر د مهاجرينو چارو له وزارت سره همکاريو ته لېوال دی او زموږ موخه له افغانستان سره مرسته او همکاري ده.
مسلکي مرستيال د يوشمېر شته ستونزو د حل د يادونو ترڅنګ د ياد دفتر د همکاريو څخه يې مننه وکړه او په راتلونکي کې يې د پلان شوو همکاريو او د هغه د اغېزمنتيا غوښتنه وکړه.
