د کډوالو لپاره د ملګرو ملتونو عالي کمشنرۍ (UNHCR) له مرستيالې سره  ناسته  ترسره  شوه

د مهاجرينو او راستنېدونکو چارو وزارت مالي او اداري مرستيال محمد ارسلاح خروټي په مشرۍ، چې د ياد وزارت مسلکي مرستيال شيخ عبد الرحمان راشد هم شتون درلود،  د کډوالو لپاره د ملګرو ملتونو د عالي کمشنرۍ (UNHCR) د حقوقي ملاتړ مرستيالې آغلې جيليان ټريګس او مل پلاوي سره ناسته ترسره شوه.

آغلې ټرګس خوښي څرګنده کړه، چې اوس په افغانستان کې د کار زمينه برابره ده، او د کارونو سره ليوالتيا هم شتون لري.

نوموړې وويل: مونږ د افغانستان استقلال ته احترام لرو، د يونيسيار اداره يوه غير سياسي اداره ده او خپلو مرستو ته به په بې پرې توګه ادامه ورکړي.

آغلې دغه راز زياته کړه، چې زمونږ د معلوماتو له مخې په ګاونډيو هېوادونو کې زياته برخه افغانان غواړي، چې په خپله خوښخ هېواد ته راستانه شي او دوی ته بايد د تعليم، صحت او نورو او لومړنيو اسانتياوو زمينه برابره شي.

ښاغلي خروټي وويل: د مهاجرت اصلي لامل جنګ پای ته رسيدل، خو د تېرو جګړو او بې عدالتيو له امله د افغانستان هرې برخې ته زيان اووښتی، چې له امله يې علمي بنسټونه هم په مادي او فکري لحاظ زيانمن شوي او له سره غور او سمون ته اړتيا لري.

نوموړي زياته کړه، ملګري ملتوونه دې په کوربه هېوادونو کې مهاجرينو ته د استوګنې د اړين اسنادو برابرولو کې مرسته وکړي ترڅو کډوال له خپلو بنسټيزو حقونو څخه برخمن شي.

مسلکي مرستيال شيخ عبدالرحمان راشد وويل: د ګاونډيو هېوادونو سربېره په ځينو اروپايي هېوادونو کې هم افغان مهاجرين له بنسټيزو حقونو بې برخې دي او يادو  ستونزو ته د رسيدګي لپاره درې اړخيزې او څلور اړخيزې ناستې ډېرې اړينې دي. هغه  زياته کړه، د مهاجرينو چارو وزارت يوه خدمتي اداره ده، چې د يوه مظلوم قشر نمايندګي کوي او د مهاجرينو موضوع بايد له سياست لرې وساتل شي.

راشد له ملګرو ملتونو وغوښتل، چې له راستنېدونکو افغانانو سره  دومره  مرسته وشي، چې له بيا ميشتېدنې وروسته د کار روزګار زمينه هم ورته برابره شي.