د کډوالو او راستنېدونکو چارو وزیر محترم مولوي عبدالکبیر د کابل د سروبي ولسوالۍ د مهاجرینو له استازو سره وکتل.
په دې ناسته کې د سروبي د کډوالو استازو، د اسلامي امارت لخوا راستنېدونکو ته پر وړاندې کېدونکو خدمتونو خوښي وښوده او زیاته یې کړه چې کډوالو ته د اسلامي امارت هر کلی او د هغوی لاس نیوی سبب شوی چې له ګاونډیو هېوادونو افغانان داوطلبانه راتګ ته زړه ښه کړي.
د حاضرینو په وینا، چې د سروبي ولسوالۍ سلګونه کورنۍ له پاکستان څخه خپل وطن ته د راتګ تکل لري او په ډله ییز ډول به راستانه شي.
د یادو کډوالو استازو د خپلو وړاندېزونو پر مهال، له اسلامي امارت څخه غوښتنه وکړه، چې د سروبي ولسوالۍ راروانو سلګونه مهاجرو کورنیو ته یو ښارګوټی په نظر کې ونیسي او دغه راز د لنډ مهاله استوګنې په موخه ورسره مرسته وشي.
محترم مولوي عبدالکبیر راغلو مشرانو او علماوو ته ښه راغلاست وویل او زیاته یې کړه، چې اسلامي امارت د کډوالو د ښه خدمت په موخه ګڼو حکومتي ادارو ته دندې سپارلې او هره چاره پر خپل وخت ترسره کېږي.
محترم وزیر څرګنده کړه، چې د اسلامي امارت لخوا په هر ولایت کې کډوالو ته ښارګوټي منظور شوي دي او د اړتیا په صورت کې به نوره ځمکه هم د مهاجرینو ښارګوټو ته ځانګړې شي.
محترم مولوي عبدالکبیر د سروبي ولسوالۍ د مهاجرینو استازو ته ډاډ ورکړ، چې اسلامي امارت د کډوالو لنډ مهاله استوګنې لپاره اړین امکانات په واک کې لري او تر دې دمه افغان حکومت د کډوالو په برخه کې د بودیجې له کمښت سره نه دی مخ شوی.
همدارنګه محترم وزیر راغلو مشرانو ته څرګنده کړه، چې د ښارګوټي وړاندېز به یې له اړوندو ادارو سره شریک شي او اسلامي امارت به د امکان ترحده ورته رسیدنه وکړي.
