د کډوالو او راستنېدونکو چارو وزارت مقام د دفتر رییس او مل پلاوي ننګرهار ولایت ته سفر وکړ
د کډوالو او راستنېدونکو چارو وزیر محترم مولوي عبدالکبیر په لارښوونه د وزارت مقام د دفتر ريیس مولوي سعید احمد بنوري په مشرۍ پلاوي له پاکستان څخه د راستنېدونکو مهاجرینو د وضعیت د ارزونې په موخه د ننګرهار ولایت تورخم فرضي کرښې ته سفر وکړ.
په دغه سفر کې چې د وزارت د کارکوونکو چارو ريیس عرفان الله عباد یې هم ملتیا کوله د تورخم د عمري کمپ له مسؤلینو او د تورخم د مهاجرینو چارو امریت څخه له لیدنې وروسته د یاد کمپ له وضعیت څخه کتنه وکړه او د راستنېدونکو مهاجرینو ستونزې یې له نږدې وکتلې.
د وزارت مقام د دفتر ريیس مسوولینو ته لازمې لارښوونې وکړې، څو د راستنېدونکو مهاجرینو ستونزو ته په بیړني ډول ځواب ووايي.
همدارنګه نوموړي د دولس ګونو کمېټو له مسوولینو سره هم لیدنه وکړه د هغوی د کارونو ارزونه یې وکړه او ډاډ یې ورکړ، چې د ستونزو د حل لپاره به یې لازم ګامونه پورته کړي.
مولوي سعید احمد بنوري څرګنده کړه، چې د مهاجرینو او راستنېدونکو چارو وزارت مشرتابه د نړیوالو همکارانو سره په ګډه هڅې کوي او د مهاجرینو ستونزو ته به لا ښه رسیدنه وکړي.
