د کډوالو او بېرته راستنېدونکو چارو سرپرست وزېر محترم مولوي عبدالکبیر خوست ته د سفر په ترڅ کې ددغه ولایت د جهادې مدرسې د دستار بندۍ په جلسه کې ګډون او وینا وکړه.
په دغه لویه غونډه کې د امربالمعروف، نهې المنکر او شکایتونو اورېدلو وزارت معین شیخ محمد فقیر محمدي، د کورنیو چارو مرستیال مولوي محمد نبي عمري، د خوست والي، سیمه ییزو مسوولینو، ګڼ شمېر علما کرامو، د پوهنتون استادانو او ولسي خلکو ګډون کړی وو.
په پیل کې محترم مولوي عبدالکبیر د فاضلانو كورنیو او علماو ته د فراغت مبارکي وویله او زیاته یې کړه چې له نیکه مرغه د اسلامي نظام تر سیوري لاندې او په بشپړ امن کې تعلیمي مرکزونه فعالیت کوي.
نوموړي اسلامي نظام د افغان ولس د قربانیو او مبارزو موخه یاده کړه.
ښاغلي وزېر څرګنده کړه چې اسلامي امارت د دین په رڼا کې د ستونزو د حل او اسلامي نظام د پیاوړتیا په موخه له سیمې او نړۍ سره اړیکې لري او دا مهال له ګڼ شمېر هېوادونو سره رسمې اړیکې د پیاوړتیا په حال کې دي.
د هغه په وینا چې پر اسلامي نظام د نیوکو پر ځای دې هڅه وشي، چې اصلاحي نظرونه له اړوندو ادارو سره شریک شي.
ښاغلي وزېر زیاته کړه چې له افغانستان څخه د سیمې او نړۍ غوښتنې د اسلامي امارت د پالیسۍ په رڼا کې تضمین شوې او دا مهال نړیوال له افغان خاورې اندېښنه نه لري.
محترم مولوي عبدالکبیر د اسلامي امارت له بریا وروسته د ولس د هوسا ژوند لپاره د هڅو یادونه وکړه او په وینا یې چې اسلامي نظام د افغانستان د پرمختګ لپاره دوامداره هڅې کوي.
محترم مولوي عبدالکببر د وینا پر مهال یادونه وکړه، چې ملي بودیجه د اسلامي امارت لخوا ورکول کیږي.
د جلسې په پای کې ټول فارغ فاضلان د ښاغلي وزیر لخوا په نقدي ډالیو ونازول شول
