د کابل د کډوالو چارو ریاست ته نوی رییس وپېژندل شو
د افغانستان اسلامي امارت رهبر عالیقدرامیرالمومنین حفظه الله د حکم پر بنسټ د کار او ټولنیزو چارو وزارت پخوانی معین ښاغلی مولوي دین محمد حقبین د کابل ولایت د کډوالو چارو ریاست د نوي رییس په توګه د یاد وزارت د اداري او مالي معین شیخ کلیم الرحمن فاني له لوري د دغه ریاست کارکوونکو ته ور وپېژندل شو.
ښاغلي فاني په دغو مراسمو کې د کابل د کډوالو ریاست د اهمیت په اړه خبرې وکړې، هغه وویل، چې د کډوالو چارو وزارت د مظلومو او کډوالو د ملاتړ ځای دی.
نوموړي د پخواني رییس عبدالرحمن حبیب زي له هڅو مننه وکړه او نوي رییس ته یې د بریا هیله څرګنده کړه.
وروسته د کابل د کډوالو چارو ریاست نوي رییس مولوی دین محمد حقبین وویل: د الله ج او د رسول الله ص تر اطاعت وروسته د امیرالمومنین حفظه الله اطاعت واجب دی او دغه نظام د بې شمېرو قربانیو په بدل کې منځته راغلی دی، دغه نظام ته، په لوړ او ټيټ بست کې، خدمت کول زموږ لپاره د ویاړ ځای دی.
هغه زیاته کړه، چې د اسلامي امارت له ځانګړنو څخه یو هم اطاعت دی، د امارت ټول غړي د یوې عقیدې ورونه دي او ترمنځ یې د نظر او لیدلوري اختلاف نه شته.
د غونډې په پای کې پخواني رییس ښاغلي حبیب زي د ښاغلي حقبین پر ګومارنه خوښي څرګنده کړه او د هر ډول همکارۍ ډاډ یې ورکړ.
