د پلان او پالیسۍ رییس: کمزورۍ باید پر ځواکمنتیا بدلې شي
دا خبره د مهاجرینو او راستنیدونکو چارو وزارت د پالیسۍ او پلان رییس مولوي محمودالحق احدي د ملګرو ملتونو د کډوالو د عالي کمیشنرۍ د سرپنا کلستر له همغږي کوونکې سره په ناسته کې وکړه.
په دې ناسته کې د راستنو شویو او داخلي بې ځایه شویو لپاره د سرپناوو پر جوړولو خبرې وشوې.
ښاغلي احدي وویل: موږ هڅه کوو چې د اسانتیاوو د رامنځته کولو لپاره خپله همکاري او همغږي زیاته کړو او له بنسټونو سره په ګډو هڅو خپلو هېوادوالو ته د خدمتونو د وړاندې کولو اړتیا په پام کې ونیسو.
هغه زیاته کړه، غوره ده چې د ستونزو د حل لپاره په ګډه کار وکړو او ناستې باید په داسې ډول ترسره شي، چې شته اداري کمزورۍ پر ځواکمنتیا بدلې کړي.
د سرپنا د کلستر د همغږۍ مشرې اغلې ایرین موتیوو وویل: زموږ له کاري لومړیتوبونو څخه یو د اړمنو او مستحقو کورنیو انتخاب دی، چې د دوی د اړتیاوو پر بنسټ په روان کال کې ۳ میلیونه ډالره مرسته د سرپناوو د جوړولو په پار ځانګړې شوې ده.
د نوموړې په وینا د دې ادارې له کاري موخو څخه یوه یې له مهاجرینو وزارت سره همکاري او همغږي ده او د ستونزو د حل، اسانتیاوو رامنځته کولو او د کار د ښه والي په موخه یې د دواړو ادارو ترمنځ پر ګډو هڅو ټینګار وکړ.
