د مهاجرینو چارو وزارت او درېو بنسټونو ترمنځ د همکاریو هوکړه لیکونه لاسلیک شول
د روغتیا او افغاني ټولنې بیارغونې موسسې، د جنډر د برابرۍ او د ملي اجنډا پراختیا او د نړیوال هئیت معاونیت سره د ۶ سوه ۸۸ زره او ۷۸۴ ډالرو په ارزښت د همکاریو هوکړه لیکونه لاسلیک شول.
د دې هوکړه ليک له مخې، د روغتیا او افغاني ټولنې بیا رغونې موسسه به د پروان ولايت د ۱ زره ۴۵۰ کورنيو لپاره د ژمنيو جامو، سون توکو په برخه کې ۶۲۲ زره ۳۷۶ ډالره لګوي.
په همدې ډول د جندر د برابرۍ او د ملي اجنډا پراختیا موسسه د ۵۰ زره ډالرو په لګښت د چرګانو کوچنيو فارمونو، د لبنیاتو د مایعاتو د تولید لپاره د دوو ماشینونو د نصبولو، د ۱۶ خیاطۍ ماشینونو، ۱۵ ګاډیو، د کاروباري مهارتونو چمتو کولو او بلخ کې د ۲۰۰ کورنیو لپاره د حرفوي کورسونو جوړولو مرسته کوي.
او د نړیوال هئیت معاونیت موسسه په بلخ کې د ۲۲۰ کورنیو لپاره د نغدو پیسو وېش په برخه کې ۱۶ زره او ۴۰۸ ډالره لګوي.
دغه هوکړه ليکونه د مهاجرينو چارو وزارت مسلکي مرستیال مولوي عبدالرحمن راشد او د دغو بنسټونو د استازو له خوا لاسليک شول.
