د مهاجرینو او راستنېدونکو چارو سرپرست وزیر محترم مولوي عبدالکبیر د یوناما له مشرې روزا اوتنبایوا سره وکتل.
په دې ناسته کې چې له آغلې اوتنبایوا سره په سیاسي چارو کې د نوموړې مرستیالې هم ملتیا کوله د افغان کډوالو، کورني بیځایه شوو او یو شمېر نورو مهمو مسایلو په هکله خبرې وشوې.
د یوناما مشرې د کډوالو او کورني بیځایه شوو په اړه د اسلامي امارت د مهاجرینو او راستنېدونکو چارو وزارت او په کابل کې د ملګرو ملتونو د ادارو تر منځ وروستۍ تخنیکي ناسته وستایله او له کډوالو سره یې د مرستو د دوام ډاډ څرګند کړ او یادونه یې وکړه چې ددې برخې لپاره به لا ډېر مالي امکانات راجلب کړي.
د آغلې اوتنبایوا په وینا چې یوناما هڅه کوي څو له اسلامي امارت سره په شریکه د کډوالو ستونزو ته د رسیدنې لپاره اغېزمن کار وکړي.
د ناستې پر دوام د یوناما مشرې زیاته کړه، چې د ملګرو ملتونو د سرمنشي مرستیال د افغانستان حالت له نږدې ارزوي او تمه ده چې له کډوالو سره د مرستو کچه لوړه شي.
همدارنګه نوموړې په بیلابیلو برخو کې له اسلامي امارت سره پر سیاسي خبرو او بحثونو ټېنګار وکړ او زیاته یې کړه، چې د بحث وړ مسایل باید د ځانګړو لارو چارو پرمټ حل شي.
محترم مولوي عبدالکبیر د یوناما مشرې او ورسره پلاوي ته ښه راغلاست وویل او له کډوالو سره د ملګرو ملتونو د ادارو لخوا له شوو مرستو یې مننه وکړه.
محترم وزیر وویل، چې د مهاجرینو لپاره په لنډمهالو پنډغالو کې ډیرې اسانتیاوې او خدمات چمتو شوي او همدارنګه کډوالو ته د دایمي ښارګوټو د ویش لړۍ هم په ښه ډول پر مخ روانه ده او تر دې دمه ۵۸ ښار ګوټي کډوالو ته په پام کې نیول شوي دي.
محترم مولوي عبدالکبیر کډوالو ته د مرستو د کچې پر لوړیدو ټینګار وکړ او وې ویل، چې د مهاجرینو د ښارګوټو په روغولو کې د ملګرو ملتونو سازمانونه ونډه واخلي.
د ناستې په پای کې محترم وزیر څرګنده کړه، چې اسلامي امارت له نړۍ سره د خبرو پلوي کوي او د شریعت په رڼا کې له ټولو اړخونو سره تعامل ته تیار دی.
د نوموړي په وینا چې اسلامي امارت د افغان خاورې امنیت تضمین کړی او د ګاونډیو په ګډون نړۍ ته له افغانستان څخه ضرر نه دی متوجه.
