د مهاجرينو چارو وزارت اداري ناسته ترسره شوه
د مهاجرينو او راستنېدونکو چارو د وزير الحاج خليل الرحمن حقاني په مشرۍ نن يکشنبه د لړم په (۲۹) مه د دغه وزارت اداري ناسته ترسره شوه. په دې ناستې کې چې د مهاجرينو چارو وزارت مالي او اداري مرستيال الحاج محمد ارسلاح خروټي، مسلکي مرستيال مولوي عبدالرحمن راشد، رئيسانو او د وزارت د بېلابېلو برخو آمرينو شتون درلود، د تېرې ناستې د پرېکړو، د هغې د تعقيب، مالي او اداري مسايلو او د کارونو د لا ښه والي په اړه خبرې وشوې.
همدارنګه په ترکيې، ايران او پاکستان کې د مېشتو افغان مهاجرو د وضعيت د ښه والي او د يادو هېوادنو څخه د افغان مهاجرينو د راستنېدو د بهير د مديريت او د کار او ټولنيزو چارو وزارت سره د کار زمينې د برابرولو په برخه کې د همغږۍ په اړه هم خبرې وشوې. د مهاجرينو او راستنېدونکو چارو وزير د بېلابېلو برخو د رئيسانو او آمرينو خبرې واورېدې او د هغوی څخه يې غوښتنه وکړه، چې ورسپارل شوي مسؤليتونه په شفاف ډول پرخپل وخت ترسره کړي.
