د ملګرو ملتونو د بشري مرستو د همغږۍ دفتر مرستیال د مهاجرینو چارو وزیر پر شهادت خواشیني وښوده.
په افغانستان کې د ملګرو ملتونو د بشري مرستو د همغږۍ د دفتر مرستیال خاطر زید د مهاجرینو او راستنېدونکو چارو وزارت له مسلکي معین الحاج مولوي عبدالرحمن راشد سره په لیدنه کې د مهاجرینو او راستنېدونکو چارو د وزیر الحاج خلیل الرحمن حقاني په شهادت خواشیني څرګنده کړه.
ښاغلي خاطر د شهیدانو روح ته دعا وکړه او د مهاجرینو چارو د وزیر شهادت یې د افغان ملت لپاره یوه ستره ضایع وبلله.
د مهاجرینو او رستنېدونکو چارو وزارت مسلکي معین له هغه او په کور دننه او بهر کې له ټولو خواخوږو څخه د مننې تر څنګ د حقانی شهادت د نه جبرانیدو وړ وباله او زیاته یې کړه: چې شهید حقاني د خپل هېواد د ټولو خلکو لپاره مهربانه او زړه سوانده شخصیت وو.
مسلکي معین شهید حقاني ته جنت، کورنۍ او خپلوانو ته یې د جمیل صبر دعا وکړه او ښاغلي خاطر ته یې د پخوا په څېر د دغه وزارت د کاري بهیر د دوام ډاډ ورکړ.
