د خوست ولایت بکیو، ایوخېلو او سیدخېلو قومونو ترمنځ بدي په دوستۍ بدله شوه
د مهاجرینو او راستنېدونکو چارو سرپرست وزیر الحاج خلیل الرحمان حقاني په مشرۍ د مختلفو ولایتونو سپین ږیرو او مشرانو په هڅو د خوست ولایت د بکیو، ایوخېلو او سیدخېلو قومونو ترمنځ رامنځته شوې دښمني په دوستۍ بدله شوه
دغه بدي، چې څو میاشتې مخکې د یوه سرک جوړولو پر سر رامنځته شوې وه، دوه کسه منځګړي مجاهدین پکې په شهادت رسېدلي وو، چې د دواړو شهیدانو د کورنیو لخوا قاتلینو ته بښنه وشوه او ټول یو بل ته په خوشالۍ ورغاړې وتل
ټولو ښکېلو غاړو له ښاغلي حقاني او ورسره مل د مختلفو ولایتونو قومي مشرانو څخه مننه وکړه او د روغې جوړې لپاره ددوی نه ستړې کېدونکې هلې ځلې یې وستایلې
