کډوالو چارو وزير د افغانستان لپاره د ملګرو ملتونو ځانګړي استازي له مرستيال سره وليدل
دغه ليدنه د تېرې چهارشنبې په ورځ د غبرګولي په۸ مه په ياد وزارت کې داخلي بېځايه شوو ته د ځواب ويلو د ګډې کړنلارې دلاسليک په څنډه کې ترسره شوه، چې پکې د بېځايه شوو وضعيت ته د رسېدنې پرڅرنګوالي او په کوربه هېوادونوکې په ځانګړې توګه په ترکيې کې د افغان کډوالو د وضعيت په اړه خبرې اترې وشوې.
د کډوالو او راستنېدونکو چارو وزير سيدحسين عالمي بلخي وويل، چې د ډالرو په مقابل کې د ايراني پيسو د ارزښت راټېټېدل ددې لامل شوي چې په هغه هېواد کې مېشت افغان کډوال افغانستان ته راستانه شي او ياهم ترکيې او اروپاته کډوال شي.
هغه زياته کړه، چې په ترکيې کې دکډوالو اوپه ځانګړې توګه دهغو کسانو چې په غيرې قانوني توګه دغه هېواد ته داخليږي پروړاندې يې ډېرې ستونزې موجودې دي. دکډوالو چارو وزارت دغې ستونزو ته د رسېدو او هلته د کډوالو مديريت په موخه څلور ځلې په لوړه او تخنيکي کچه دهغه هېواد د چارواکو سره خبرې اترې کړي دي.
دهغه په خبره هغه خلک چې په خپله خوښه له اسنادو سره له ترکيې هېواد څخه افغانستان ته راستنېږي د راستنېدنې اسناد يې لاسليک کېږي.
ښاغلي بلخي وويل،چې له کوربه هېوادونو څخه په جبري توګه دکډوالو ويستل له افغانستان پروضعيت ناوړه اغېز لري، شونې ده چې دغه کسان د وسله والو ډلو سره يوځای شي، هغه په همدې موخه د افغانستان لپاره د ملګرو ملتونو ځانګړي استازي له مرستيال څخه وغوښتل، چې ددغې ادارې له ادرسه په ترکيې کې دافغان کډوالو دمديريت په موخه دترکيې له چارواکو سره خبرې وکړي.
په افغانستان کې دملګرو ملتونو ځانګړي استازي مرسيتال ښاغلي توبي لنذر ژمنه وکړه، چې په کابل کې دترکيې له سفير سره به خبرې وکړي ترڅو د افغانستان پيغام د ترکيې چارواکو ته ورسوي.
