د مهاجرینو چارو وزارت مسلکي مرستیال د کابل ښار د پلازمینې ترمینل مېشتغالی وکاته
د مهاجرینو او راستنېدونکو چارو وزارت مسلکي مرستیال مولوي عبدالرحمن راشد د وږي پر پنځمه په کابل کې د پلازمینې ترمینل مهاجرینو مېشتغالی څخه وکاته.
په دې کتنه کې د کابل ولایت د مهاجرینو چارو رییس مولوي عبدالرحمن حبیب زي او د لنډمهاله استوګنې کمیسیون غړي مولوي نصرت الله طلحه هم برخه اخیستې وه، چې د کتنې موخه یې د راستنو شویو مهاجرینو د ستونزو اوریدل او د مېشتغالي د احاطوي دیوال دبشپړېدو څارنه وه.
ښاغلي راشد له نږدې د راستنو شویو ستونزې واورېدې او د حل ژمنه یې وکړه.
دغه راز نوموړي روغتیایي سيار مرکز، چې د کابل ولايت د عامې روغتيا رياست په مرسته راستنېدونکو ته روغتيايي خدمتونه وړاندې کوي، هم وکاته او د هغوى چارې يې وڅېړلې.
د یادولو وړ ده چې د دې مېشتغالي ۴۰۸ متره اوږد دیوال د مهاجرینو د ستونزو د حل عالي کمیسیون د لنډمهاله استوګنېکمیټې له لوري د کابل ولایت د مهاجرینو چارو ریاست سره همغږۍ او همکارۍ د راستنېدونکو د د ښه امنیت د تامین په موخه جوړیږي.
