د مهاجرینو لپاره د چین لخوا مرسته شوي توکي د تورخم مسولینو ته وسپارل شول
د مهاجرينو او راستنېدونکو چارو وزارت د سرپرست وزیر الحاج خلیل الرحمن حقاني له لورې د داخلي بېځایه شویو او راستنېدونکو مهاجرینو د بیا میشتولو لپاره د چین حکومت لخوا مرسته شوي اته عراده امبولانسونه، د اوبو ټانکرونه، پیکپ موټرې او یو شمېر خېمې د ننګرهار ولایت د مرستیال والي په شتون کې د تورخم اړوندو مسولینو ته وسپارل شول
په ورته مهال د مهاجرینو چارو سرپرست د تورخم اړوند عمري لنډمهاله کمپ، د مهاجرینو چارو له آمریت او همدا راز هلته د موجودو همکارو موسساتو له مختلفو شعبو څخه هم لیدنه وکړه
ښاغلي حقاني په دغه لیدنه کې د کاري کمېټو چارې وارزولې، ددوی ستونزې او وړاندیزونه یې له نږدې واورېدل او د کارونو د روڼتیا او چټکتیا لپاره یې لازمې سپارښتنې ورته وکړې
د یادونې وړ ده، چې په ننګرهار کې د وروستي طوفان له امله عمري کمپ هم ډېر زیان لیدلی، چې د بیا اساسي جوړولو لپاره یې د مهاجرینو چارو وزیر هوډ څرګند کړ
